按怎Chhōe

0. 名詞定義

  • 羅馬字台文：

    • 白話字

      白話字（Pe̍h-ōe-jī），台灣傳統台語正寫法（orthography, writing system），tī台灣釘根超過150冬，台語文獻數量siōng chē。

    • 教部羅

      教部羅（教育部羅馬字拼音，全名叫做中華民國教育部臺灣台語羅馬字拼音方案。在來民間台語文運動慣勢叫白話字做「台灣羅馬字」，簡稱「台羅」，教部羅主張簡稱「台羅」這ê名hâm民間傳統有衝突，咱無beh使用。

    • -（詞號）

      在來號做「連劃」，將音節lia̍h做詞。

    • --（輕聲號）

      在來號做「雙連劃」，記輕聲調。

1. 按怎Kéng

  • Kāng款--ê：Chhōe完全kāng款--ê。
  • 相關--ê：Chhōe內底nā有kauh關鍵詞--ê。

2. Chhōe siáⁿ

  • 羅馬字台文：

    • 白話字(輸入式)

      「輸入式」免台語輸入法mā ē-tàng chhōe。聲調phah數字，khǹg tī音節siōng尾。第1、4調數字ē-tàng免phah。白話字「o͘」phah『oo』，鼻音「ⁿ」phah『nn』。譬喻beh chhōe「chho͘」ài phah『chhoo』、beh chhōe「siâⁿ」ài phah『siann5』。

    • 白話字

      用台語輸入法直接phah。

    • 教部羅(輸入式)

      「輸入式」免台語輸入法mā ē-tàng chhōe。聲調phah數字，khǹg tī音節siōng尾。第1、4調數字ē-tàng免phah。譬喻beh chhōe「pe̍h」ài phah『peh8』。

    • 教部羅

      用台語輸入法直接phah。

    • -（詞號）

      Ē-tàng用詞號「-」a̍h是1 ê半形ê空白「 」來chhōe，不管資料內底有詞號、無詞號、a̍h是輕聲號，lóng chhōe有。譬喻不管beh phah『au7-jit8』a̍h是『au7 jit8』，「āu ji̍t」、「āu-ji̍t」、「āu--ji̍t」lóng chhōe有。用輸入式『au7 jit8』a̍h是文字式『āu-ji̍t』來chhōe lóng ē-tàng。看無mā無要緊，lóng phah空白（『au7 jit8』）to̍h好，橫直beh hō͘你khah好chhōe niâ。

    • --（輕聲號）

      Sòa頂1條說明--ê，nā用輕聲號「--」ê時，tio̍h kan-na chhōe ē tio̍h有輕聲號ê詞。譬喻phah『au7--jit8』ē chhōe tio̍h「āu--ji̍t」。用輸入式『au7--jit8』a̍h是文字式『āu--ji̍t』lóng ē-tàng。
  • 漢字(漢羅)台文：Phah台文，漢字a̍h是漢羅合用--ê。
  • 對應英文：Phah英文來chhōe台語。
  • 對應日文：Phah日文來chhōe台語。
  • 對應中文：Phah中文來chhōe台語。

3. 用正規表示式（REGEX）來chhōe特殊規則。

  • 說明

    • 見本

      下底語法列khah chia̍p用--ê。見本tī『』內底。

    • 提醒

      基本tek大部份語法kan-na ē-tàng kō͘「輸入式」來chhōe。

    • 建議

      初學者建議先學會曉按怎用『%』kap『~』。
  • 功能

    • 『%』：Khǹg tī 1 ê音節ê字母後壁，ē-tàng chhōe所有ê聲調。

      譬喻「白話字(輸入式)」phah『tha%』，ē-tàng chhōe tio̍h「tha」、「thà」、「thah」、「tha̍k」等等。

    • 『~』：Ē-tàng代表1 ê音節，a̍h是1 ê音節內底ê元素。

      1. 譬喻『~ ~ ~』ē-tàng chhōe tio̍h所有3 ê音節ê詞。譬喻『~ ~ ~ ~』ē-tàng chhōe tio̍h所有4 ê音節ê詞。
      2. Nā kap其他ê字母、聲調數字黏做伙（無hō͘空白隔--開），代表黏做伙ê部份是1 ê音節，「~」代表kāng 1 ê音節ê元素。譬喻beh chhōe「sat-ba̍k-hî」soah bē曉鬥字，kan-na知影開頭ê字母。Phah『s~ b~ h~』tio̍h chhōe ē tio̍h所有3 ê音節ê詞，而且3 ê音節ê頭1 ê字母是「s、b、h」--ê。譬喻phah『san3 ~ia~』ē-tàng chhōe tio̍h「sàn-chia̍h」、「sàn-chhiah」等等。

    • 『~』進階版：Sòa『~』ê功能，ke 3款變化：『~x』、『~<』kap『~>』。Kan-na「輸入式」chiah thang用。

      1. 『~x』khioh起『~』ê功能，mā ē-tàng代表無半ê物。譬喻「白話字(輸入式)」phah『~ang%』，ē-tàng chhōe tio̍h「tâng」、「chàng」等等。Phah『~xang%』koh thang chhōe tio̍h「ang」、「âng」等等。
      2. 『~<』代表1 ê音節--ni̍h所有聲頭字母，也就是所有子音（「p、ph、m」等等）。譬喻「白話字(輸入式)」phah『~<ng%』，ē-tàng chhōe tio̍h「chhng」、「chǹg」、「nn̄g」等等。Thang避免chhōe tio̍h「chàng」、「phóng」等等。
      3. 『~>』代表1 ê音節--ni̍h所有核心、尾liu ê字母kap聲調數字，也就是kā聲頭子音the̍h掉，chhun ê字母kap聲調數字。譬喻「白話字(輸入式)」phah『ch~> ch~>』，ē-tàng chhōe tio̍h「châi-chêng」、「cháu-cheng」、「chiáⁿ-chúi」等等。Thang避免chhōe tio̍h「chhài-chhī」、「chheng-chúi」等等。

    • 『.*』：代表有某mih字元，a̍h是無物件。字元不管幾ê lóng算。

      譬喻「白話字(輸入式)」phah『.*png7』，ē-tàng chhōe tio̍h「âng-tāu-pn̄g」、「be̍h-á-pn̄g」、「chhài-pn̄g」、「pn̄g」等等。

    • 『.』：代表有1 ê字元。

      譬喻「白話字」phah『p.』，ē-tàng chhōe tio̍h「pa」、「pá」等等。「對應中文」phah『豬..』，ē-tàng chhōe tio̍h「豬頭皮」、「豬血湯」等等。

    • 『{}』：用來指定『{}』內底羅馬字是完整--ê。台語羅馬字音節是完整--ê，a̍h是英文word是完整--ê。

      1. 請先kéng「相關--ê」來chhōe。譬喻「白話字」phah『{chio}』ē-tàng chhōe tio̍h「chio」、「chio-ho͘」、「keng-chio-iû」等等。Thang避免chhōe tio̍h「chioh」、「chiok」、「sio-chioh-mn̄g」等等chit款音節--ni̍h koh有別ê字母a̍h是聲調ê詞。Kan-na kéng「相關--ê」chhōe「羅馬字台文」kap「對應英文」chiah有路用。
      2. 請先kéng「相關--ê」來chhōe。譬喻英文『{rice}』ē-tàng chhōe tio̍h「rice」、「rice seed」、「to cook rice」等等。Thang避免chhōe tio̍h「licorice」、「the price」、「rice-water」等等chit款koh有別ê字母ê word。Kan-na kéng「相關--ê」chhōe「羅馬字台文」kap「對應英文」chiah有路用。

    • 『^』：Khǹg tī siōng頭前，ē-tàng chhōe所有chit ê開頭ê詞。

      請先kéng「相關--ê」來chhōe。譬喻「白話字(輸入式)」phah『^ho2』，ē-tàng chhōe tio̍h「hó」、「hó-bī」、「hó-chhùi-súi」、「hó-bâ koán-pah-ke」等等。

    • 『$』：Khǹg tī siōng後壁，ē-tàng chhōe所有chit ê結束ê詞。

      請先kéng「相關--ê」來chhōe。譬喻「白話字(輸入式)」phah『sin5$』，ē-tàng chhōe tio̍h「sîn」、「châi-sîn」、「bô-thâu-sîn」、「kūn-biō khi-sîn」等等。

    • 『@』：Khǹg tī字母後壁，ē-tàng chhōe所有押韻ê詞。特別設計來寫唸歌、歌仔冊。

      請先kéng「相關--ê」來chhōe。譬喻「白話字(輸入式)」phah『ai@』，ē-tàng chhōe tio̍h「chhài」、「an-pâi」、「bô-lō͘-sái」、「chhiò-hai-hai」等等。Kan-na khǹg tī「羅馬字台文」siōng後壁chiah有路用。

    • 『(|)』：Siāng時chhōe無kâng ê詞。

      1. 譬喻「白話字(輸入式)」phah『h(oe|e)2 chhia』，ē-tàng chhōe tio̍h「hóe-chhia」kap「hé-chhia」。Mā ē-tàng phah『(hoe2 chhia|he2 chhia)』。
      2. 譬喻「白話字(輸入式)」phah『(san3 chiah8|san3 chhiah|san3 hiong)』。
      3. Mā ē-tàng chhōe咱人ê名姓可能按怎唸。請先kéng「Kāng款--ê」。譬喻「漢字(漢羅)台文」phah『(陳|水|扁)』，就會知影有可能叫「Tân Súi-pián」、「Tân Chúi-píⁿ」等等。

    • 『() \1』：Ē-tàng用月眉號「()」去kho͘ 1 ê範圍，chhōe文字有重複--ê。

      1. 譬喻ē-tàng chhōe「AAA」ê詞，chhōe『(jin5) \1 \1』ē chhōe tio̍h「jîn-jîn-jîn」。譬喻chhōe『(~) \1 \1』ē chhōe tio̍h所有「AAA」ê詞。
      2. 譬喻ē-tàng chhōe「ABB」ê詞，chhōe『peh8 (~) \1』ē chhōe tio̍h「pe̍h-chhang-chhang」、「pe̍h-soat-soat」、「pe̍h-siak-siak」等等。譬喻chhōe『~ (~) \1』ē chhōe tio̍h所有「ABB」ê詞。
      3. 譬喻ē-tàng chhōe「AAB」組合ê詞，chhōe『(chap8) \1 ~』ē chhōe tio̍h「cha̍p-cha̍p-háu」、「cha̍p-cha̍p-kiò」、「cha̍p-cha̍p-liām」等等。譬喻chhōe『(~) \1 ~』ē chhōe tio̍h所有「AAB」ê詞。
      4. 每1組「()」kho͘--ê對應1 ê「\N」，N代表kho͘--tio̍h ê順序號碼。譬喻ē-tàng chhōe所有「AABB」ê詞，chhōe『(~) \1 (~) \2』ē chhōe tio̍h「hoaⁿ-hoaⁿ-hí-hí」、「kú-kú tn̂g-tn̂g」等等。
      5. 每1組「()」kho͘--ê對應1 ê「\N」，N代表kho͘--tio̍h ê順序號碼。譬喻ē-tàng chhōe所有「ABAB」ê詞，chhōe『(~) (~) \1 \2』ē chhōe tio̍h「bô-ì-bô-ì」、「chi̍t-ê chi̍t-ê」等等。

    • 『\ 』：ChhoeTaigi有取代幾ê符號是REGEX原底有teh用--ê。Nā beh用舊底--ê，請tī頭前ke『\』。

      1. Nā beh ka-tī寫REGEX『 』（空白1格），請改做『\ 』（正chhu線chiap空白1格）。
      2. Nā beh ka-tī寫REGEX『-』，請改做『\-』。
      3. Nā beh ka-tī寫REGEX『{』，請改做『\{』。
      4. Nā beh ka-tī寫REGEX『}』，請改做『\}』。
咱頂面所講--ê，nā bô清楚，a̍h是使用ê時ū tú tio̍h問題，歡迎kap gún聯絡。多謝！